Како што соопшти АВМУ, пресудата се однесува на обвинение за „злоупотреба на лични податоци“, поврзано со објавување на име и презиме на судија на социјалните мрежи Инстаграм и ТикТок.
Од Агенцијата предупредуваат дека кривичното гонење на новинари за објавување информации за носители на јавни функции, кога тоа е направено во контекст на професионално новинарско работење, создава дополнителен притисок врз медиумите и сериозно го ограничува правото на јавноста да биде навремено и точно информирана.
„Ваквите постапки имаат потенцијал да создадат ефект на заплашување и самоцензура, што е спротивно на демократските стандарди и принципите на слободно информирање“, се наведува во реакцијата.
АВМУ апелира сите релевантни институции и чинители активно да придонесат за создавање услови за непречено остварување на слободата на изразување и информирање, како и за доследна заштита на новинарите и медиумските слободи во земјата.