Австралија му дава на Twitter 28 дена да ги отстрани „токсичноста и омразата“. Во спротивно…

од Vladimir Zorba
252 прегледи

Австралиското тело за заштита на безбедноста на интернетот во четвртокот се закани дека ќе го казни Twitter поради неуспехот да се справи со онлајн малтретирањето и рече дека има пораст на „токсичноста и омразата“ откако Елон Маск го купи Twitter.

Комесарката за е-безбедност, Џули Инман Грант, поранешна вработена во Twitter, рече дека платформата сега е одговорна за една од три онлајн жалби за говор на омраза пријавени во Австралија.

Инман Грант рече дека Twitter има 28 дена да покаже дека е сериозен во решавањето на проблемот или ќе се соочи со казна од 700.000 австралиски долари за секој ден кога ќе го пропушти крајниот рок.

Порача дека Twitter мора да преземе серија конкретни чекори кои покажуваат „што прави за да спречи онлајн омраза на својата платформа и да ги спроведе сопствените правила“.

„Потребна ни е одговорност на тие платформи и акција за заштита на нивните корисници“, рече таа. „Не можете да имате одговорност без транспарентност, а тоа се обидуваат да го постигнат со законските известувања како оваа“, додаде Грант.

Откако ја купи платформата во октомври 2022 година, Маск отпушти повеќе од 80 отсто од глобалната работна сила, вклучително и многу од модераторите на содржината одговорни за спречување злоупотреба.

Во ноември, Маск објави широка амнестија која им овозможи на десетици илјади суспендирани или забранети сметки да се вратат на платформата.

„Twitter се чини дека пропушти можност да се бори против омразата“, рече Инман Грант, која работеше на сајбер безбедноста во компанијата по 17 години поминати во Microsoft.

Таа рече дека чуварот не е единствениот загрижен „за зголемувањето на нивоата на токсичност и омраза на Twitter кои конкретно ги таргетираат маргинализираните заедници“.

Австралија води глобален притисок за регулирање на платформите на социјалните медиуми и ова не е прв пат Инман Грант јавно да го повика Twitter.

Таа му пиша на Маск во ноември и изрази стравување дека големиот број отпуштања ќе ја остават компанијата неспособна да ги почитува австралиските закони.

Новинарот Стен Грант, една од најпочитуваните медиумски фигури во Австралија, во мај рече дека поднел жалба до Twitter поради „немилосрдните расни навреди“ на кои наишол додека ја користел платформата.

Големите музички куќи во Соединетите Држави започнаа правна постапка против Twitter овој месец. Тие тврдат дека платформата не успеала да го спречи „неконтролираното“ прекршување на авторските права.

Комесарот за внатрешен пазар на Европската комисија, Тиери Бретон, во јуни го обвини Twitter дека избрал „конфронтација“ откако се повлече од доброволниот Кодекс на добра практика за спротивставување на дезинформациите.

Слични содржини