Според Азески, државата наместо да креира долгорочни политики за задржување на работната сила – преку повисоки примања, подобри услови за работа и поголема сигурност во вработувањето се определува за краткорочен пристап кој само привремено го ублажува недостигот од кадар. Таквата пракса, како што предупреди, може да изврши дополнителен притисок врз платите и да ја намали подготвеноста на компаниите да инвестираат во развој и обука на домашните работници.
„Не може да се зборува за одржлив економски развој ако увезуваме работна сила затоа што не сме изградиле услови нашите луѓе да останат и да работат во земјата“, истакна Азески, нагласувајќи дека одговорноста за состојбите на пазарот на трудот е заедничка и на институциите и на бизнис-заедницата.
Од Владата претходно соопштија дека мерката за ангажирање странски работници е неопходна поради хроничниот недостиг од работна сила во одредени дејности, пред сè во градежништвото, угостителството и делови од индустријата, и дека таа ќе се применува ограничено и под строг надзор.
Азески најави дека Стопанската комора ќе бара отворање поширока јавна расправа и интензивен социјален дијалог, со цел да се дојде до трајни и одржливи решенија кои нема да го нарушат балансот на домашниот пазар на труд.