Американскиот претседател Џо Бајден претстави агресивен и амбициозен план за вакцинација за две третини од американските работници, вклучително и оние вработени во приватниот сектор, но и огромното мнозинство вработени во федералните тела, кои би можеле да се соочат со дисциплински мерки доколку одбијат вакцинација, пренесува „Њујорк Тајмс“. Според првичните проценки, оваа драматична одлука ќе влијае на околу 100 милиони Американци.
Овие обемни мерки го претставуваат најголемиот потег на администрацијата на Бајден досега во насока на борба против пандемијата на коронавирус, пишува „Њујорк тајмс“.
Според проценките на овој весник, одлуката на Бајден ќе го допре речиси секој аспект на американското општество.
Одлуката е исто така одраз на фрустрацијата на Бајден поради фактот што околу 80 милиони Американци кои можат да се вакцинираат се уште не го сториле тоа.
„Ќе ги заштитиме вакцинираните работници од оние кои се уште не се вакцинирани“, рече Бајден во говорот.
Според оваа одлука, сите работодавачи со повеќе од 100 вработени ќе треба да ги вакцинираат своите работници или да ги подложуваат на тестирање за коронавирус неделно.
Доколку работниците одбијат да се вакцинираат, ќе се соочат со „стандардна процедура за човечки ресурси“, изјави портпаролката на Белата куќа, Џејн Псаки.
Синдикатите веќе најавија дека ќе протестираат против одлуката на Бајден.
Бајден, исто така, рече дека вакцинацијата ќе биде побарана од здравствени работници кои прифаќаат еден од двата вида здравствено осигурување – Medicare или Medicaid – како и за сите државни вработени и изведувачи и некои други категории.
Новата задолжителна вакцинација е дел од стратегијата на Белата куќа во шест чекори во борбата против делта сојот, стратегија која вклучува давање трета, бустер доза, со цел да се спречи зголемениот број случаи, хоспитализации и смртни случаи од Ковид-19.
Шесте чекори вклучуваат вакцинирање на невакцинираните, зајакнување на заштитата за вакцинираните, одржување на училиштата отворени и безбедни, зголемување на бројот на тестови и барање на маски, заштита на економското закрепнување и зголемување на здравствената заштита за луѓето со Ковид-19.