Американскиот претседател Џо Бајден разговараше со украинскиот претседател Володимир Зеленски и најави нов пакет воена помош пред Денот на независноста на Украина, соопшти Белата куќа.
Американскиот министер за одбрана Лојд Остин, кој во петокот разговараше и со неговиот украински колега Рустем Умеров, на социјалните мрежи објави дека пакетот е вреден 125 милиони долари.
Во разговор со Зеленски, Бајден ја потврди „непоколебливата“ поддршка на Вашингтон за Украина во нејзината војна со Русија. Пакетот помош вклучува ракети за противвоздушна одбрана, противдронска опрема, противтенковски ракети и муниција, се вели во соопштението на Белата куќа.
Повиците дојдоа во пресрет на Денот на независноста на Украина.
„На Украина ѝ е потребно снабдување со оружје од најавените пакети, особено дополнителни системи за воздушна одбрана за сигурна заштита на градовите, заедниците и критичната инфраструктура“, рече Зеленски во соопштението објавено од неговата канцеларија.
Откако го зазеде Крим од Украина во 2014 година, Русија започна целосна инвазија на својот сосед во февруари 2022 година. Соединетите Американски Држави оттогаш обезбедија воена и хуманитарна помош за Украина, а исто така воведоа санкции кон Москва поради инвазијата.
Вашингтон обезбеди повеќе од 50 милијарди долари воена помош за Украина од 2022 година.