Страшна вест ја потресе американската заедница Смиттаун во понеделникот кога тринаесетмесечно девојче почина откако нејзината баба ја оставила во жежок автомобил, каде девојчето ги поминало следните осум часа, пишува ABC.
Според информациите од локалната полиција на округот Сафолк, девојчето требало да биде однесено во градинка, но бабата (54) го заборавила детето на седиштето и отишла на работа, а температурата од 28 степени се покажала фатална.
Кога несреќната баба, осум часа подоцна, се вратила во автомобилот за да оди во градинка да го земе детето, сфатила што се случило. Веднаш повикала брза помош и девојчето било пренесено во болница, но за жал, лекарите не можеле да и го спасат животот.
Истрагата за несреќата е во тек, а полицијата ги проверува сите околности за да утврди дали имало невнимание. Се уште не е поднесена кривична пријава.
Секоја година во САД 40 деца умираат од топлотен удар, повеќето од нив затоа што родител или старател ги остава во автомобил, според американското Министерство за транспорт.