Министерот за економија Крешник Бектеши денеска ќе оствари средба со претставници од ланците на супермаркети во врска со мерките што ќе следат во делот на утврдување на цените на прехранбените производи. Најави дека на предлог на Министерството за економија, на следната седница на Владата во вторник треба да се донесе одлука да се замрзнат цените на прехранбените производи.
Бектеши исто така вчера информира дека испратил предлог-одлука за забрана на сите супермаркети и трговци до 30 ноември да нудат акциски и промотивни продажби.
„Можеби ова изгледа како чудна одлука, имајќи предвид дека на граѓаните ќе им ускратиме одредени намалувања на цените. Но, не е така бидејќи следната недела ќе има одлука за намалување на цените во прехранбената индустрија“, рече Бектеши.
Според него, одлуката за забрана за промотивна и акциска продажба е донесена „затоа што е забележано дека одредени синџири на супермаркети прават измами со можност за создавање промотивна продажба или одредени кампањи“.
„За да им биде јасно на потрошувачите и на граѓаните, тие нема да ја имаат оваа можност и точно ќе знаат колку е одредена цена, а не да ја пресметуваат дневно или неделно со тие цени и да ги доведуваат во заблуда“, додаде Бектеши.
Министерот потенцира дека очекува до понеделник, пред одлуката за замрзнување на цените на прехранбените производи, да има линеарно намалување на цената на сите прехранбени производи за најмалку 10 отсто.
Тој посочи дека инфлацијата е намалена, но дека според анализите на Министерството за економија има голем простор за дополнително намалување на цените на прехранбените производи.
Бектеши истакна дека сите завршни сметки, особено на големите синџири супермаркети, „покажуваат дека минатата година немале намалување, туку зголемување на приходите“ и додаде дека „од крајот на 2019 година берзанските цени во светот се зголемени за 23,3 проценти, а во Северна Македонија, за жал, за 47 проценти“.