За топланите и за дел од индустријата, имаме доволни количини на гас кои сме ги отвориле дополнително за државата. Сепак имајќи ја во предвид, потрошувачката во земјата, а најголем потрошувач е ТЕ-ТО, ние мислиме дека од бугарската страна е нефер пристапот да се воведе такса, а паралено со тоа да се даваат во закуп на истата компанија на која и воведувате такса, вели министерот за економија, Крешник Бектеши за воведената такса од Бугарија за транзитот на рускиот гас.
Во земјава, истакнува Бектеши, потрошувачката е 400 милиони нормални метри кубни. Половина се ослободени, а другата половина мора да биде снабдувана од Газпром и со нивна дозвола да се користат други снабдувачи.
Посочи дека преку веќе ослободените капацитети на гасоводот се снабдуваме со азербејџански природен гас и ЛНГ гас од САД и од некои други земји кој доаѓа од терминалите во Турција и Грција.
-Ако се ослободат уште дополнителни 200 милиони нормални кубни метри тогаш земјава ќе има нула потрошувачка на руски гас што најверојатно ќе оди на штета на некои од сегашните снабдувачи, но ќе биде во интерес на државата. Снабдувачот кој има директен договор со Гаспром веќе почна да ја зголемува цената со вкалкулирани 10 евра за транспорт низ Бугарија, рече Бектеши.
Во државата, како што кажа има два снабдувача кои користат само руски гас од кои едниот е фирма сестра на ТЕ-ТО, а другиот е македонска фирма и тие веќе стануваат неконкурентни на пазарот за снабдување со природен гас во земјава.