Сергеј Алејник ги обвини литванските власти за финансирање на паравоени сили кои, наводно, се обидуваат да ја соборат владата во Минск.
„Можеби би им дал совет на литванските политичари. Престанете да ги поддржувате екстремистите и да ги финансирате нивните активности“, изјави шефот на белоруската дипломатија во интервју за РИА Новости.
Тој нагласи дека литванските политичари се свесни за паравоените формации кои наводно се наоѓаат на територијата на Литванија, а кои планираат промена на власта во Белорусија.
Шефот на КГБ на Белорусија, Иван Тертел, претходно изјави дека има околу 50 странски фондови во Литванија, Полска и Украина кои ја финансираат промоцијата на политиката на „мека сила“ кон Белорусија, како и радикални опции за промена на власта во таа земја.
По претседателските избори во 2020 година во Белорусија, некои членови на опозицијата, меѓу кои и поранешната претседателска кандидатка Светлана Тихановска, заминаа во Литванија.
Тихановска беше осудена во отсуство од белорускиот суд на 15 години затвор под обвинение за заговор за преземање на државната власт, создавање и водење на екстремистичка група, јавни повици за санкции, поттикнување социјален раздор и предавство, потсетува РИА Новости.