Карим Бензема, поранешната ѕвезда на Реал (Мадрид) и сегашен играч на Ал Итихад, ги сподели своите размислувања за моменталната ситуација во шпанскиот клуб и предизвиците со кои се соочуваат неговите двајца пријатели Килијан Мбапе и Винисиус Жуниор.
„Мбапе е исклучителен, но за мене тој е лево крило, а не централен напаѓач. Проблемот е што Винисиус веќе ја зазема таа позиција и моментално е најдобар играч на светот“, изјави Бензема во интервју за „Ел Чирингито“.
Бензема ги прокоментира и високите барања во Реал Мадрид, каде секој промашен гол се чувствува акутно. „Во Реал притисокот е огромен. Мбапе мора да научи да се справува со тоа. Ако не постигнете гол на 2-3 натпревари, критиките ќе паднат врз вас. Но, тој има квалитети и потенцијал да го направи тоа“, додаде носителот на „Златната топка“ за 2022 година.
За позицијата на Мбапе, Бензема изрази јасен став: „Тој мора да се прилагоди и да научи да игра како бр.9 бидејќи Винисиус не може да се откаже од своето место лево. Килијан е талентиран, но сега треба да го покаже истото ниво на друга позиција“.
Завршувајќи со поддршката за неговиот поранешен клуб, Бензема рече: „Реал Мадрид секогаш се враќа, особено кога луѓето се сомневаат во нив. Секогаш ќе верувам во нив и имам целосна доверба во нивниот успех“.