Експертите предупредуваат дека многу возачи не знаат дека лековите за настинка може да предизвикаат вртоглавица.
Зимата е во полн ек, а некои возачи можеби го прекршуваат законот без да се свесни за тоа. Оние кои земаат лекови за настинка и грип мора да бидат особено внимателни во сообраќајот, пишува „Дејли Стар“.
Експертите за автомобилизам на Quotezone.co.uk издадоа предупредување до возачите да не земаат никакви лекови кои би можеле да влијаат на нивната способност за возење.
Некои лекови кои се земаат во зима може да предизвикаат поспаност и да го загрозат вашиот живот
Како што температурата опаѓа, многу луѓе се со грип или настинка. Сепак, некои возачи можеби не знаат дека некои лекови може да имаат несакани ефекти.
Експертите предупредуваат дека многу возачи не знаат дека лековите за настинка без рецепт може да предизвикаат вртоглавица, поспаност, нарушено расудување и побавно време на реакција и ги советуваат оние кои земаат такви лекови да избегнуваат возење или управување со било какво возило.
„Можеби не мислите дека земањето апчиња за настинка и грип би довело до казна, но многу вообичаени лекови кои се издаваат без рецепт имаат состојки кои можат да ве направат поспани“, вели Грег Вилсон, основач и главен извршен директор на Quotezone.co.uk.
Тој додаде дека „ако не се чувствувате добро, проверете дали тоа што го земате ќе ве направи поспани или ќе ви предизвика вртоглавици или има некакви несакани ефекти кои можат да влијаат на вашата способност за возење, како што се заматен вид или бавни реакции“.
„Сите ние понекогаш се чувствуваме како да немаме време да бидеме болни, животите ни се премногу зафатени, но возењето кога сте болни може да биде опасно. Дури и ако сте навикнати да земате лекови и тоа претходно не влијаело на вашето возење, ако ве запре полиција или учествувате во сообраќајна несреќа и вашиот лек има предупредување да не ракувате со тешки машини, веројатно ќе платите казна. Најбезбедно е да избегнувате возење, да се одморите и да не ризикувате“, вели експертот.