Претседателот на Регулаторната комисија за енергетика (РКЕ) Марко Бислимовски чека извинување за, како што вели, нападите поради високата цена на нафтените деривати во изминатите неколку месеци.
-Како што знаете, особено бевме напаѓани јас и Комисијата поради цените на нафтените деривати. Па, дури јас бев залепен на плакати низ Скопје и се чувствував дека сум најголем криминалец во државата. И тогаш кажував дека тоа се лажни вести, изјави денеска Бислимовски на прес-конференција.
Бислимовски вели дека РКЕ цената ја пресметува според утврдена методологија која се користи во цела Европа.
-Во последните две-три недели, пред се заради паѓање на цената на нафтените деривати на светските берзи, како и поради намалување на курсот на доларот, РКЕ ја намали цената на горивата за повеќе од 30 денари. И денеска ќе има намалување на дизелот за 1,5 денар по литар, на бензинот ЕУРОСУПЕР БС-98 исто за 1,5 денар, а на ЕУРОСУПЕР БС-95 за еден денар. Секогаш повикуваме да се верува на институциите. Нашите одлуки се базирани на методологии. Очекувам тие што ме ставија на билборди јавно да се извинат и да престанат со неосновани напади врз РКЕ, рече денеска Бислимовски на прес-конференција.
-Сето тоа што се случува на светските берзи, го рефлектираме на нашите одлуки. Да се надеваме дека трендот ќе продолжи и ќе се одржат овие цени. Ние не измислуваме цени и работиме под стриктно утврдени методологии, истакна Бислимовски.