Вицепремиерот на Косово, Бесник Бисљими, потврди дека во четврток, на 16 ноември, ќе се сретне со директорот на Канцеларијата за Косово, Петар Петковиќ, и со специјалниот пратеник на Европската унија за дијалог, Мирослав Лајчак, во Брисел.
Бисљими ова го изјави на заедничката прес-конференција со шефот на мисијата на Европската унија во Приштина, Томаш Суњог, по повод презентацијата на извештајот на Европската комисија за напредокот на Косово на патот кон Европската унија.
„Веќе не сме во фаза на преговори во Брисел. Ние сме во фаза на спроведување на договорот. Нема повеќе компромиси во преговорите. Компромисите се завршени. Ние сме во фаза на спроведување на договорот, каде што Косово инсистира договорите да се спроведуваат без одлагање и без предуслови“, рече меѓу другото, Бисљими.
Шефот на мисијата на Европската унија на Косово посочи дека за натамошен напредок на европскиот пат, на Косово меѓу другото му се потребни судски реформи, борба против корупцијата и криминалот, но и напредок во дијалогот со Белград, како и дека за укинување на казнените мерки што Европската унија ги воведе кон Приштина, неопходно е да се започнат активности за формирање Заедница на српски општини.