Министерството за транспорт и врски информира дека министерот Благој Бочварски денеска во просториите на Министерството за транспорт и врски остварил работна средба со претставниците на Сојуз на синдикати на Македонија и претставници од Здружение на градежништвото индустријата на градежни материјали и неметалите.
Како што велат, на средбата се разговарало за пакетот законски измени кои се опфатени за изградба на Коридорите 8 и 10-Д, посебно во делот на надлежностите на Министерството за транспорт и врски, односно Законот за градење и Законот за урбанистичко планирање.
-Министерот Бочварски го потенцираше проектот за доизградба на Коридорот 8 и Коридорот 10-Д како најзначаен инфраструктурен капитален проект со стратешко значење, на кој се посветува огромно внимание и посочи дека претставува огромна можност домашната градежната оператива да биде вклучена во неговата реализација.
Министерот побара целосна поддршка од градежните комори се со цел брза, навремена и ефикасна изградба на автопатските делници на споменатите коридори.
Од Здружение на градежништвото индустријата на градежни материјали и неметалите истакнаа дека ги препознаваат предностите на измените на Законот за градење и Законот за урбанистичко планирање, како и Законот за експропријација, со можност постапките да се применуваат и врз другите капитални проекти.
На средбата се отвори и прашањето за Законот за работни односи и неговата примена во проектот за изградба на автопатските делници на Коридорите 8 и 10, при што се разгледаа неколку опции и Министерството и ССМ се согласија на нова средба со конкретни предлози по празниците, велат од МТВ.