Ескалацијата на војната меѓу Русија и Украина толку сериозно ги загрижува Грците што се обидуваат да останат чекор понапред од потенцијалниот развој на ситуацијата. Тие купуваат залихи од храна, лекови, а некои од нив дури градат и засолништа за да се засолнат во случај на нуклеарна војна.
Станува збор за претежно добро ситуирани семејства кои ангажираат приватни фирми, кои во последните денови почнаа да „никнуваат како печурки“ и нудат најсовремена технологија и максимална безбедност во случај на катаклизмичен конфликт. Поучени од потезите на некои западни влади кои ги упатуваат своите граѓани како да се однесуваат во случај на руски напад, богатите Грци не оставаат ништо на случајноста, пишува „Greek Reporter“.
Така, според Томас Хаусос, сопственик на компанијата што нуди изградба на вакви засолништа, две веќе се градат во голем обем во областа на Атина и едно во северниот дел на земјата. Хаусос, кој почна да се занимава со оваа работа веднаш по почетокот на конфликтот меѓу Русија и Украина, во февруари 2022 година, вели дека интересот за изградба на засолништа или дополнителна опрема за постоечките расте од ден на ден во Грција. Станува збор за засолништа изградени по Втората светска војна според законот според кој секоја нова станбена зграда морала да има некакво засолниште.
Хаусос објаснува дека првенствено нуди специјални непробојни врати на заинтересираните клиенти, но важен е и системот за вентилација кој содржи специјални филтри кои спречуваат навлегување на биохемиски материи и радиоактивни остатоци. Предвидени се и т.н суви или хемиски тоалети и складишта за храна и вода. Нуклеарното засолниште мора да биде најмалку два метри под земја, но секако може да биде и на поголема длабочина. Цената на ваквите прифатилишта е околу 70.000 евра.