Министерот за надворешни работи на ЕУ, Жосеп Борел, го осуди ракетирањето на израелска територија од страна на Хамас и го поддржа правото на Израел да се брани „пропорционално и во согласност со меѓународното хуманитарно право“.
По вонредната видео-конференција на министерот за надворешни работи на ЕУ, свикана поради ескалација на насилството меѓу Израел и Палестинците, Борел истакна дека 26 од 27 земји-членки ја поддржуваат „општата позиција“ во контекст на кризата оценета како најтешка во Израел и окупираните палестински територии од 2014 година.
„Приоритет е непосреден прекин на насилството и престанок на воените активности со цел да се заштитат цивилите и да се овозможи испорака на хуманитарна помош до Газа“, рече Борел.
Тој додава дека насилството што се случува во Појасот Газа последните денови доведе до голем број цивилни жртви, вклучително и многу жени и деца, и нагласува дека тоа е неприфатливо.
„Израел и Палестина имаат право на безбедност и за тоа е потребно вистинско политичко решение“, наведува Борел, пренесе Танјуг.
Шефот на дипломатијата на ЕУ изјави дека покрај основниот приоритет, запирање на насилството, потребно е да се започне и со воспоставување на политички дијалог, враќање на довербата и „потенцијално започнување на мировен процес кој е блокиран подолго време“.
Борел посочи на засилен ангажман на ЕУ со цел да се запрат воените дејствија и да се врати на дијалогот и истакна дека на ова ќе се работи заедно со новата администрација во Вашингтон.