Бошњачката партија (БС), Демократскиот сојуз на Албанците (ДУА) и Демократската партија (ДП) ќе го поддржат актуелниот претседател на Црна Гора, Мило Ѓукановиќ, на претседателските избори закажани за в недела, објавија денеска подгоричките медиуми.
Според ЦДМ, властите на БС одлучиле да го поддржат Ѓукановиќ на претстојните избори, а според „Вијести“, истата одлука донеле и двете албански партии, ДУА и ДП.
Во Форца се уште немаат официјален став за поддршка за претседателски кандидат и покрај тоа што лидерот на таа партија Генци Ниманбегу, како што претходно најави, лично би гласал за високиот функционер на Социјалдемократската партија (СДП), Драгиња Вуксановиќ Станковиќ.
Одлуката за тоа кој ќе биде поддржан на претседателските избори вечерва ќе донесе Албанскиот форум.
Претседателските избори во Црна Гора се одржуваат во недела во многу вжештена атмосфера поради тешката повеќемесечна институционална и политичка криза.
Во претседателската трка учествуваат седум кандидати, а доколку ниту еден од нив не добие повеќе од 50 отсто поддршка, вториот изборен круг ќе се одржи на 2 април.
Кандидатите се актуелниот претседател и кандидат на ДПС Мило Ѓукановиќ, претседателот на Демократите Алекса Бечиќ, претседателот на Нова српска демократија и еден од лидерите на ДФ Андрија Мандиќ, заменик-претседателот на Движењето Европа сега Јаков Милатовиќ, Пратеничката на СДП Драгиња Вуксановиќ Станковиќ, лидерот на Обединета Црна Гора Горан Даниловиќ и инфлуенсерот Јован Радуловиќ.