Железничките компании соопштија дека можат да извршат само околу една петтина од услугите низ Велика Британија, пренесе АП.
Само еден месец откако претходниот прекин на работата доведе до најголемиот прекин на железницата во последните три децении, чистачите, сигналистите, работниците за одржување и персоналот на станицата учествуваа во нов штрајк, кој траеше 24 часа.
Вработените генерално бараат зголемување на платите, подобрување на условите за работа и побезбедни работни места, а железничките компании сакаат да ги намалат трошоците, а во таа смисла и бројот на вработени, наведува АП.
Националниот синдикат на железнички, поморски и транспортни работници (RMT) ја отфрли најновата понуда на работодавачите во врска со зголемувањето на платите, бидејќи оцени дека тоа не одговара на зголемувањето на инфлацијата, која во Британија во јуни годинава изнесуваше 9,4 отсто.
Генералниот секретар на RMT, Мик Линч изјави дека синдикатот ќе продолжи да преговара „со добра волја“, но дека неговите членови, како што наведе, никој нема да ги малтретира или доведува во заблуда.
– Владата мора да престане да се меша во овој спор, за да можат работодавците во железницата да се договорат со нас – рече Линч.
Од друга страна, британскиот секретар за транспорт Грант Шапс ги обвини синдикалните лидери дека „се обидуваат да предизвикаат што е можно поголем прекин во секојдневниот живот на милиони вредни луѓе низ целата земја“.
Минатиот месец синдикатот организираше три еднодневни штрајкови кои ги блокираа железничките услуги низ поголемиот дел од земјата.
Повеќе штрајкови се планирани за следната сабота, кога и машиновозачите треба да ги напуштат своите работни места, наведува американската агенција.