Во Лас Вегас, ноќта меѓу четвртокот и петокот по средноевропско време се одиграа натпревари од летната НБА лига, а погледите повторно беа насочени кон двајца млади играчи кои беа големи разочарувања за кошаркарската јавност. Овој пат, едниот беше успешен, а другиот продолжи со партии кои и најголемите скептици не ги очекуваа.
Лос Анџелес Лејкерс го победија Кливленд Кавалирс со резултат 93:89, а Леброн Џејмс Јуниор одигра солидна партија во златно-виолетовиот дрес на „езерџиите“.
Синот на еден од најдобрите кошаркари на сите времиња одигра 25 минути и забележа 13 поени (5/10 од поле), 5 скока и 3 асистенции. Тоа беше најдобриот натпревар на Брони откако изненадувачки доби загарантиран договор со Лејкерси, и покрај тоа што беше избран доцна во втората рунда.
Младиот Џејмс имаше многу слаби перформанси на претходните натпревари во Летната лига, но сега покажува дека можеби ќе може да му помогне на Џеј Џеј Редик (и на неговиот татко кој се подготвува за Олимпијадата) како член на ротацијата следната сезона.
Најдобар кај Лејкерси беше Далтон Кнехт со 20 поени и 7 скока, а кај Кливленд се истакна Џејлон Тајсон со 21 поен, 11 скока и 9 асистенции.