Европската интеграција на Република Северна Македонија / РСМ / не бара обиди за влијание и притисок преку трети земји, туку постигнување вистински резултати во билатералниот дијалог со Бугарија. Ова го изјави претседателот на Бугарија, Румен Радев на денешната средба на Дондуков 2 со специјалниот пратеник на Владата на Република Северна Македонија, Владо Бучковски, соопшти претседателството.
„Ние сме отворени за партнерство и очекуваме непоколеблива политичка волја од страна на политичарите од РСМ да промовираат експертска работа и да докажат дека добрососедството меѓу нашите две земји е реалност“, рече шефот на државата.
Бугарија никогаш не го оспорила демократското право на самоопределување на граѓаните на Република Северна Македонија, но идентитетот на една земја не може да се гради врз омраза кон друга, особено кон братска земја, додаде претседателот. Румен Радев истакна и дека Бугарија во принцип и доследно ја поддржува европската перспектива на РСМ, но не може да дозволи воведување на нерешени билатерални прашања во Европската унија.
Бугарското општество е исклучително чувствително на сигналите испратени од државните институции во Северна Македонија во врска со билатералните односи, потсети претседателот. Според шефот на државата, напуштањето на говорот на омраза кон Бугарија во земјата, во медиумите, промената на содржината на учебниците, работата на научните институти и натписите на историските споменици и музеи ќе биде вистински придонес во градењето добрососедски односи. Радев повика на активен билатерален дијалог на сите нивоа меѓу Бугарија и Република Северна Македонија, во кој, во духот на доверба и разбирање, треба да се бараат изводливи решенија.
Заеднички став е дека пријателството меѓу граѓаните од двете страни на заедничката граница треба трајно да се воспостави и на меѓудржавно ниво.
„Нема омраза меѓу нашите граѓани. Ние сме должни пред идните генерации да ги затвориме контроверзните прашања“, рече Владо Бучковски и повика на соработка меѓу Бугарија и Република Северна Македонија да продолжи да се развива во области од заеднички интерес како што се економијата, транспортот, туризмот, образованието и науката.