Бугарската полиција информира дека се откриени сторителите на вандалскиот чин врз македонскиот клуб „Никола Вапцаров“ во Благоевград. Тие биле приведени во полициска станица поради кршењето на стаклата од објектот.
„Четири лица се приведени. Целосно признаа дека го сториле делото“, изјавила за „Радио Благоевград“ Јорданка Шаркова, портпаролка на Регионалната управа на бугарското Министерството за внатрешни работи – Благоевград.
Според информациите на бугарската полиција, станува збор за двајца мажи и две жени.
Прозорецот на македонскиот клуб во Благоевград беше искршен вечерта на 4-ти февруари, на годишнината од раѓањето на Гоце Делчев.
Македонските власти го осудија ваквиот немил настан и побараа детална истрага за инцидентот.
Клубот беше отворен во тензична атмосфера лани на 30 октомври во присуство на гости од Македонија и Македонци што живеат во Бугарија.