Институциите во Скопје не изнесоа вистински аргументи за оспорување на регистрацијата на бугарските здруженија, изјавил денеска заменик-министерот за надворешни работи на Бугарија, Костадин Коџабашев на прес-конференција, како реакција на вчерашното бришење на клубот „Иван Михајлов“ од Централниот регистар на Македонија.
-Длабоко сме вознемирени од дејствијата на Северна Македонија за ограничување на правата на здружување и слободно изразување на бугарската заедница во земјата, додал Коџабашев.
Тој нагласил дека при затворањето на бугарскиот клуб „Иван Михаилов“, „Скопје не изнесе вистински аргументи“.
-Одлуката е непринципиелна и тенденциозна и со тоа имињата на здруженијата се ставаат во искривен историски и идеолошки контекст. Фактот дека верувањата на Бугарите во РСМ не се компатибилни со тамошната историска доктрина, не значи дека не се компатибилни со правниот поредок и демократските принципи. Оценките за Иван Михајлов не се потпираат на обемниот корпус на историски докази и се насочени кон зачувување на монополот на намерно и ревизионистичко толкување на нашата заедничка историја, особено во однос на тврдењата за антисемитските убедувања на Иван Михаилов, изјавил тамошниот заменик-министер.
Коџабашев информирал дека „Бугарија ќе се обрати до Европската Унија за заштита на правата на Бугарите во Македонија“.
Тој потсетил дека Бугарија се уште чека информации и ефикасна правда против сторителите на, како што вели, нападите врз бугарските здруженија.
-Бавното спроведување на правдата е силно во спротивност со брзината со која беше донесена одлуката за бришење на клубот во Битола, реагирал Коџабашев.