Министерството за надворешни работи на Република Бугарија остро го осудува овој чин врз зградата на бугарската надворешна мисија во Скопјe – симбол на државноста и официјалното присуство на Република Бугарија во Република Северна Македонија. Ова е неприфатлив напад врз статусот на дипломатската мисија и грубо кршење на Виенската конвенција за дипломатски односи, стои во соопштението на бугарското МНР.
„Министерството за надворешни работи ја изразува својата длабока загриженост што ваков смел чин е резултат на систематскиот недостаток на реакција од страна на надлежните институции на Република Северна Македонија на претходните напади и акти на вандализам врз локации поврзани со Бугарија и бугарската заедница.
Оваа институционална пасивност, во комбинација со толерираниот, па дури и поттикнат говор на омраза против Бугарија и Бугарите кај нашиот сосед, создаде средина во која ваквите кривични дела се охрабруваат и ескалираат.
Ги повикуваме надлежните органи во Република Северна Македонија веднаш да ги преземат сите потребни мерки за идентификување на сторителот и негово целосно доведување пред кривична одговорност, како и да ја гарантираат безбедноста на бугарските дипломатски и конзуларни претставништва, нивниот персонал и нивниот имот.
Република Бугарија очекува институциите во Република Северна Македонија јасно и недвосмислено да се дистанцираат од манифестациите на омраза, ефикасно да се спротивстават на ваквите злосторства, целно да работат на создавање фундаментално поинаков јавен наратив за односите со Бугарија и безусловно да ги исполнат своите меѓународни обврски.
Министерството за надворешни работи ќе продолжи внимателно да го следи развојот на случајот и го задржува правото да преземе дополнителни мерки во одбрана на бугарските интереси“, стои во реакцијата на МНР на Бугарија.