Челси започна преговори со Барселона околу трансферот на Пјер-Емерик Обамејанг, пренесува британскиот печат. Поранешната ѕвезда на Арсенал постигна 11 гола на 13 натпревари откако им се приклучи на Каталонците во јануари, но најверојатно ќе отпадне од стартниот тим по трансферот на Роберт Левандовски. Челси планираше да поднесе понуда за габонскиот напаѓач на почетокот на оваа недела бидејќи сака да ја пополни својата празнина во нападот по враќањето на Ромелу Лукаку на позајмица во Интер.
Екипата на Барселона, која летово беше доста активна на трансфер пазарот и покрај финансиските компликации, сака да ги продаде своите високо платени играчи за да собере дополнителни средства. Менаџерот Чави сака да го ангажира Бернардо Силва од Манчестер Сити, но најверојатно ќе мора да ги продаде Обамејанг и Френки де Јонг за да го доведе играчот од средниот ред.
Шефот на „сините“, Томас Тухел има позитивен однос со 33-годишниот поранешен напаѓач на Борусија Дортмунд и би сакал да додаде докажан стрелец во редовите на Челси. Обамејанг веќе изјави дека не сака да ја напушти Барселона и се чувствува добро во Шпанија.
Челси ремизираше 2-2 со Тотенхем во драматичното лондонско дерби на „Стемфорд Бриџ“ во неделата и е седми во Премиер лигата по второто коло.