Кафулиња, ресторани, хотели и базени се отвораат утре во Чешка во новата фаза на мерки за олеснување, воведени во борбата против коронавирусот.
Кафулињата и рестораните целосно се отвораат откако претходно им беше дозволено да им служат на гостите само во надворешната област на објектот. Се отвораат хотели и станови и затворени и надворешни базени.
Дворците и замоците, исто така, ќе ги отворат своите врати за посетителите во понеделник, а до 300 учесници и гледачи ќе можат да присуствуваат на спортските настани.
Строгите мерки за хигиена остануваат на сила низ целата земја, пренесува Хина.
Министерот за здравство Адам Војтех во неделата рече дека некои мерки, како што е забрана за посети во болници, ќе останат на сила подолго во источниот регион Карвина.
Регионот е ново жариште по избувнувањето на коронавирусот во рудникот Дарков. Досега, 212 рудари и членови на нивните семејства се позитивно тестирани за коронавирус.
На странските туристи сè уште им е забранет влез во Чешка и датумот на повторно отворање на границите не е познат.
Заклучно со денес, во Чешка беа потврдени 8.932 случаи на коронавирус и 315 смртни случаи.