Претседателот на Чешка, Петр Павел ја повика Европската унија навреме да се подготви за опцијата Доналд Трамп да победи на претседателските избори во САД и веднаш да се договори со рускиот претседател Владимир Путин, со цел тоа да биде поволно за Русија, а не за Украина или Европа.
„Тоа не е оспорување на САД како сојузник. Треба реално да признаеме дека Доналд Трамп на многу работи гледа поинаку. Мора да признаеме дека ако тој биде избран легитимно на демократски избори, мора да ја почитуваме одлуката на американските гласачи, но мора да бидеме подготвени за тоа“, изјавил Павел за тамошниот радио-сервис „Радиожурнал“.
Во врска со ситуацијата во Украина, чешкиот претседател рекол дека, за разлика од Русија, Украина има, пред сè, ограничување на работната сила на фронтот.
„Можеме да помогнеме со технологии, информации, финансиски, но не можеме да им помогнеме да ги пополнат резервите кај луѓето. Украина на тој начин добива препораки од своите сојузници за ограничување на офанзивните операции и зајакнување на одбраната. Во Русија има претседателски избори и Русија врши притисок врз офанзивата. За одбрана, на Украина нема да и треба само одбранбено оружје, туку и оружје што ќе и помогне да ги прекине патиштата за снабдување на руската армија“, кажал Павел, велејќи какво оружје треба да испрати Западот во Украина.
Павел предупредил дека дезинформациите и доведувањето на јавноста во заблуда се тврдења дека војната се води само на истокот на Украина или дека во Киев нема војна и дека таму животот е нормален, како што неодамна изјави словачкиот премиер Роберт Фицо.
„Несомнено има војна во Украина. Исто така, точно е дека најчесто во Киев продолжува нормалниот живот, но за жал тој нормален живот е прекинат со ракети кои убиваат луѓе од време на време. Ова не е нормална ситуација. За жал, тоа е војна. Да се искривува така што војната или како што Русите ја нарекуваат некаква специјална операција не е само на истокот на Украина е сериозна измама на јавноста“, кажал претседателот.
Чешкиот претседател истакнал дека можеби е заморно да се слушаат постојани вести за војната и помошта за Украина, но дека секој треба да се запраша што е навистина во прашање.
„Не се работи само за тоа кој ќе биде суверен на територијата што ја нарекуваме Украина. Станува збор за тоа како ќе изгледа европската и глобалната безбедност во иднина. Затоа што во случај Русија да успее целосно како што замислува, односно да ја контролира целата територија на Украина, само ќе ги зајакне своите заклучоци. Тоа значи дека е можно да се нападне суверена земја и да се форсира сопствениот интерес“, порачал Павел.