Четири лица се лишени од слобода поради случаи на семејно насилство, додека во последните 24 часа се евидентирани вкупно осум пријави на подрачјата на Скопје, Тетово и Струмица.
Во Струмица, утринава во 03:30 часот, полициски службеници од СВР Струмица го привеле 23-годишниот Е.Д., осомничен дека претходниот ден во семејниот дом физички ја нападнал својата 20-годишна сопруга.
Во Скопје, нешто по полноќ, во 00:10 часот, полицијата го лишила од слобода 23-годишниот М.А., кој според пријавата, во домот на подрачјето на Бит Пазар физички ја нападнал својата 51-годишна мајка, нанесувајќи ѝ тешки телесни повреди. Повредите биле констатирани во Комплексот клиники „Мајка Тереза“.
Претходно, во Тетово, во 15:00 часот, бил приведен 44-годишниот А.А. од село Боговиње, по пријава од негов роднина дека подолг период му упатувал закани поради меѓусебни недоразбирања.
Истиот ден, во 17:10 часот во Скопје, полицијата го привела и 38-годишниот К.П., осомничен дека во домот физички ја нападнал својата 53-годишна вонбрачна партнерка.
Покрај приведените, полицијата евидентирала и неколку други случаи на семејно насилство. Во Скопје, 27-годишна жена пријавила дека нејзиниот сопруг физички ги напаѓал нивните две малолетни деца. Исто така, 23-годишна жена пријавила дека нејзиниот сопруг повеќепати ја нападнал физички и психички ја малтретирал.
Дополнително, 65-годишна жена пријавила дека нејзиниот син во текот на изминатата недела ја вознемирувал и ѝ се заканувал, додека 45-годишна жена навела дека нејзиниот сопруг, со кого е во бракоразводна постапка, континуирано ја вознемирувал, ѝ се заканувал и преку нивниот син се обидувал да ја следи.
Од Министерството за внатрешни работи информираат дека се преземаат мерки за целосно расчистување на случаите, по што против сторителите ќе бидат поднесени соодветни пријави.