Српскиот министер за внатрешни работи Ивица Дачиќ потврди за „Данас“ дека српската полиција поседува звучно оружје, колоквијално наречени „звучни топови“, од 2021 година.
„Овие системи се во нашите магацини во кутии. Тие се во сопственост на МВР, но не се пуштени во употреба, ниту се поставени на некое од нашите возила или системи“, изјави Дачиќ за „Данас“.
Да потсетиме, Дачиќ претходно изјави дека му пишал на директорот на ФБИ, Каш Пател и побарал помош за стручна анализа бидејќи МВР се соочува со јавни и медиумски обвинувања дека полицајци употребиле звучен топ за време на протестот во Белград на 15 март.
На прашањето зошто тогаш изјавил дека МВР не поседува звучен топ или друго слично звучно оружје, тој рече дека тоа е „несмасна изјава“.
„Тоа е несмасна изјава. Со тоа се мисли дека МВР не ја вклучило оваа алатка во својот арсенал на присилни средства“, рече Дачиќ.
Го прашаа и зошто државата однапред го купила системот, кога не е дозволена нивна употреба.
„Тоа е неуспешна инвестиција. Во тоа време веројатно се мислеше дека ќе биде усвоен нов закон за полиција кој ќе предвидува употреба на звучно оружје како уште едно средство за принуда“, рече тој.
Дачиќ немаше конкретен одговор кој ќе одговара за „пропаднатата инвестиција“ и за потрошените пари на сите граѓани.
„Не знам, тогаш не бев министер за полиција“, рече Дачиќ.
Дачиќ претходно денеска на седница на собраниската Комисија за безбедност изјави дека МВР има звучен топ од американската компанија „Генезис“, „ЛРАД 100Х“.
„Не е користен и нема да се користи, бидејќи за тоа треба да се даде наредба“, рече Дачиќ и додаде дека тоа е наједноставната алатка што постои.