Младиот менаџер на Манчестер Јунајтед, Рубен Аморим имаше необична средба пред неделната пресметка со Брајтон со легендата на „црвените ѓаволи“, Сер Алекс Фергусон, кој присуствуваше на натпреварот од Премиер лигата на неговиот поранешен клуб на „Олд Трафорд“.
Вчерашниот натпревар на гигантот од Манчестер се одржа во спомен на покојниот Денис Ло, еден од најважните играчи во историјата на Јунајтед, а Фергусон по тој повод дојде на стадионот и успеа да се сретне со Аморим пред натпреварот.
По натпреварот, во кој Јунајтед беше поразен од Брајтон со 3-1, Аморим пред новинарите зборуваше за средбата со Фергусон, велејќи дека трофејниот стручњак му рекол да остане позитивен.
Ваквите зборови можеби немаат соодветна тежина кога се гледаат изолирано од Фергусон, но ако се има предвид кој ги кажал, ќе бидеме сигурни дека се кажани во вистинско време и на вистинско место.
Иако е неучтиво и премногу дрско да се споредуваат Фергусон и Аморим од оваа дистанца, стартните позиции на Фергусон и Аморим се многу слични, па можеби споменатата средба во иднина ќе има поголемо значење отколку што е дадено во моментов.
За што се работи?
Фергусон, како и Аморим, пристигна во Јунајтед во ноември, кога веќе беше јасно дека сезоната е загубена и дека и најмало подобрување ќе биде дочекано со ентузијазам.
Трофејниот стручњак го предводеше Јунајтед до 11. место во дебитантската сезона 1986/87 година, додека генерацијата предводена од Аморим моментално е рангирана две места подолу, со ист број бодови зад Брентфорд.
Иако стартот на Аморим беше подобар од оној на Фергусон, Алекс успеа да победи едвај во третиот меч, впечаток е дека Шкотланѓанецот се снајде многу подобро како што одминуваше сезоната, додека Португалецот се уште „ика“ по два месеци од доаѓањето во клубот.
За тоа сведочи податокот дека тој веќе бил поразен седум пати, додека Фергусон загуби осум натпревари во воведната сезона.
Јасно е дека шок-терапијата на Јунајтед со Аморим не успеа, но долгорочно може да „испадне“ да добијат нов Фергусон.