Дали еден погрешен одговор може да чини 163 милијарди долари? Може, доколку е даден од вештачка интелигенција при презентација на нејзините неограничени можности.
Токму тоа се случуваше во последните два дена, откако промотивното видео за Bard, конкурентот на ChatGPT развиен од Google, даде погрешен одговор на прашање за вселенскиот телескоп James Webb на НАСА, јавува Би-Би-Си.
Bard вели дека JWST „ги направил првите фотографии од планета надвор од нашиот Сончев систем“, што категорично не е случај и веднаш предизвика бурни реакции кај астрономската заедница. Како резултат на тоа, во средата, акциите на матичната компанија на Google, Alphabet, паднаа за повеќе од 7%, намалувајќи ја пазарната вредност на организацијата за 100 милијарди долари.
Google веднаш соопшти дека грешката ја нагласува потребата од „ригорозното тестирање“ на кое Bard е подложен пред неговото јавно објавување, кое е планирано за следните недели. Но, тоа не го промени расположението на акционерите, бидејќи акциите паднаа за уште 4,4% во четвртокот, што ја турна загубата на пазарната вредност на Alphabet на 163 милијарди долари.
Грешка со долгорочни последици
Според експертските мислења собрани од „The Guardian“, иако доста импресивни, оваа загуба нема да биде единствената последица за Google од киксот на Bard.
Ден Ајвс, аналитичар во американската компанија за финансиски услуги Wedbush Securities, го нарече прекинот во средата „црн ден за Google, надополнет со добриот ден на Microsoft со ChatGPT“.
„Сметаме дека е лошо да се избрза со демонстрациите и да се прикажуваат такви грешки на ваков клучен настан поврзан со вештачката интелигенција“, рече категорично тој, цитиран од изданието.
Харалампос Писурос, висок инвестициски аналитичар во брокерската куќа XM, за возврат прокоментира дека неточниот одговор на Bard на промотивното видео на Google „ја зајакнува загриженоста дека компанијата губи терен од конкурентот Microsoft“.
Човечки е да се греши, но тоа не важи за вештачката интелигенција
И Bard и ChatGPT се засноваат на големи јазични модели – тип на вештачка невронска мрежа која се храни со огромни количини текст од Интернет во реално време и генерира одговори на текстуални прашања.
ChatGPT стана сензација од неговото лансирање минатиот ноември, бидејќи може да креира текст на суштински секоја тема.
Сепак, истакнува „The Guardian“, оваа платформа прави и фактички грешки.
Мајкл Вулдриџ, професор по компјутерски науки на Универзитетот во Оксфорд, е категоричен дека системите засновани на големи јазични модели ќе продолжат да прават такви грешки „во догледна иднина“.
„Никогаш не треба да го земаме здраво за готово она што ни го кажуваат големите јазични модели, без разлика колку е тоа веродостојно. Технологијата е моќна и многу возбудлива, но не може да и се верува 100%“, рече тој за публикацијата.
Д-р Томас Ланкастер, виш научен соработник по информатика на Империал колеџ во Лондон, исто така очекува проблемите со одговорите на Bard и ChatGPT да продолжат.
„Ние сме многу, многу далеку од добивање на совршени одговори од овие модели“, вели тој.