Рафаел Надал застана во одбрана на светскиот рекет број 1, Јаник Синер, откако Италијанецот беше позитивен на допинг тест, но избегна казна откако беше ослободен, објави Ројтерс. Шпанската легенда рече дека Италијанецот ненамерно земал забранети супстанци и дека не може да се третира поинаку само затоа што е светски рекет број еден.
Во март, Синер беше позитивен на стероидот клостебол за градење мускули, но беше ослободен откако комисијата ја прифати неговата верзија дека резултатот се должи на неговиот физиотерапевт кој лекувал рана на раката пред масажа, со спреј што ја содржи забранетата супстанција.
Надал смета дека може да им се верува на антидопинг организациите.
„Имам квалитет или мана да верувам во добрата волја на луѓето. Го познавам Синер и не верувам дека намерно се допингувал“, рече Надал во емисијата „Ел Ормигеро“. „Мислам дека не мора да ни се допаѓаат работите ако се решаваат поинаку од она како размислуваме. На крајот на денот, правдата е правда и јас верувам во неа“, додаде легендата.
„Верувам во организации кои треба да носат одлуки и да го прават тоа кога веруваат дека е правилно“, рече Надал.
Меѓународната агенција за тениски интегритет (ITIA) го ослободи Синер, судејќи дека нивото на клостебол пронајден во неговото тело е помало од еден милијардити дел од грамот.
Новак Ѓоковиќ повика на „јасни протоколи“ и „стандарден“ пристап кон случаите на допинг, додека Австралиецот Ник Киргиос верува дека Синер требало да биде казнет без разлика дали неговите позитивни тестови биле „случајни или намерни“.
„Апсолутно сум убеден дека ако не биде санкциониран, тоа е затоа што тие што треба да му судат, јасно одлучија дека нема санкции што треба да се воведат“, рече Рафа Надал, кој го пропушти УС Опен.
„Не верувам дека поради тоа што е Синер не е казнет, а да беше некој друг, ќе беше казнет. Мислењето на другите е исто така целосно достојно за почит, но ова е мое мислење“, заклучи Рафаел Надал.