Откако се дозна дека Елон Маск стана мнозински акционер на Twitter и се приклучува на бордот на директори на компанијата, стана јасно дека оваа социјална мрежа ја чека интересен и турбулентен период и дека ќе се случат одредени промени. Маск ги навести промените во првите твитови откако дозна за својата нова улога на Twitter, а тоа е воведување на опцијата за уредување твитови.
Најголемиот акционер на Twitter не застана тука и во изминатите 24 часа објави бројни твитови поврзани со оваа социјална мрежа, а некои од нив нема да им се допаднат на вработените во компанијата, кои веќе се загрижени за улогата на Маск во компанијата.
Во еден од тие твитови тој се запраша – „дали Twitter умира“, мислејќи на неактивноста на најпопуларните корисници на оваа мрежа. Тој објави листа на првите десет профили на оваа мрежа кои имаат меѓу 77 и 131 милион следбеници и напиша дека повеќето од овие луѓе ретко твитаат и дека објавуваат многу малку содржина.
Како пример ја наведе Тејлор Свифт, велејќи дека не објавила ништо три месеци, додека Џастин Бибер објавил само еден твит оваа година.
Most of these “top” accounts tweet rarely and post very little content.
Is Twitter dying? https://t.co/lj9rRXfDHE
— Elon Musk (@elonmusk) April 9, 2022
Самиот Маск е рангиран на осмото место на оваа листа и е веројатно најактивниот корисник меѓу првите 10 луѓе со најмногу следбеници и понекогаш изгледа дека живее на Twitter бидејќи постојано објавува нешто и често комуницира со другите корисници на оваа мрежа.
Покрај најавата за „смртта на Twitter“, Маск се осврна и на постоечката Twitter Blue опција на оваа социјална мрежа, за која предложи измени – намалување на цената, можност за плаќање во dogecoin и забрана за рекламирање.
Потоа објави неколку анкети кои не тераат да се запрашаме дали некој го хакнал неговиот профил. Имено, тој најпрвин направил анкета во која прашал дали седиштето на Twitter во Сан Франциско треба да се претвори во засолниште за бездомници бидејќи и онака вработените не доаѓаат таму на работа, а потоа дали треба да се отстрани буквата „w“ од Twitter.