„Добро е што Европа се ослободува од зависноста од руските фосилни горива, но тоа не смее да значи создавање нови зависности“, изјави Штиер на промоцијата на книгата „Европска енергетска независност преку инвестиции во обновливи извори на енергија: зајакнување на слободата“.
Автор на книгата е Јулије Домац, претседател на Европската мрежа на регионални и локални енергетски агенции и региони (Федерана) и претседател на Регионалната енергетска агенција на северозападна Хрватска (РЕГЕА).
Штиер предупреди дека при користењето обновливи извори на енергија, Европа не треба да се потпира на кинеска технологија, туку да развива сопствени решенија, додавајќи дека нови зависности може да се појават и од одредени трансатлантски партнери.
„Европа мора преку енергетската транзиција да постигне стратешка автономија“, истакна Штиер, кој беше домаќин на расправата по повод претставувањето на книгата.
Тој нагласи дека додадена вредност на делото е тоа што прашањата за енергетската политика и зелената транзиција не ги разгледува исклучиво низ призмата на климатските промени, туку ги зема предвид и геополитичките реалности, како и потребата од поконкурентна европска економија.
Според Штиер, Хрватска треба да го зголеми користењето на геотермалната енергија, каде што има компаративни предности, како и да ја зајакне енергетската мрежа, при што и хрватските компании би можеле активно да учествуваат во нејзината обнова.
Јулије Домац изјави дека заедно со коавторите сакал да создаде конкретен манифест за тоа што Европската Унија треба да преземе во областа на енергетската независност, врз основа на најдобрите искуства на европските региони и градови.
„Нема слобода без енергетска независност, нема безбедност без сигурно снабдување со енергија“, нагласи Домац.
Тој додаде дека и Европската Унија и Хрватска треба својата иднина да ја темелат на обновливи извори на енергија, енергетска ефикасност и целосно искористување на расположливите ресурси. Во книгата се предложени 11 конкретни мерки за постигнување поголема енергетска ефикасност и долгорочен енергетски суверенитет преку проширување на обновливите извори, зајакнување на внатрешниот енергетски пазар и промовирање децентрализирано производство на енергија.