Според информациите од Белгија, Кевин Де Бруин сака да ја продолжи кариерата во Наполи и побарал директен разговор со тренерот Антонио Конте.
Играчот од средниот ред на Манчестер Сити ќе биде слободен агент по 30 јуни, кога му истекува договорот, и бара нов предизвик по долгиот престој во англискиот клуб. Веќе имаше извештаи за преговори со тимот од Неапол, а интересот на Де Бруин за регионот е добро познат – тој го избрал Соренто, во близина на Неапол, како локација на неговата свадба.
Белгискиот експерт за трансфери, Саша Таволиери, тврди за „Скај Спортс“ дека Наполи му понудил на Де Бруин двегодишен договор со можност за продолжување за уште една сезона. Играчот од средниот ред дал принципиелна согласност и чека конкретна понуда за плата, свесен дека никој во Европа не може да му ја понуди неговата моментална плата во Манчестер Сити од 20 милиони евра по сезона.
Таволиери, исто така, инсистира дека е планиран разговор помеѓу Де Бруин и Конте, иако сè уште не е јасно дали Италијанецот ќе остане на чело на Наполи следната сезона.