Деловната политика на Манчестер Јунајтед очигледно не е квалитетна, со оглед на тоа што во последно време секој што го напушта „Олд Трафорд“ цвета во нова средина. Еден од најдобрите примери е Давид Де Хеа кој блеска во Фиорентина. Од италијанскиот клуб се задоволни од неговиот настап, толку што планираат да ја продолжат соработката со шпанскиот голман.
По една година пауза, Де Хеа се врати во форма и се пресели во Серија А, во која доминира оваа сезона. Тој е еден од најдобрите голмани во лигата, а Виола е пресреќна со својот голман. Со тоа раководството на клубот планира да ја активира клаузулата за продолжување на договорот со Шпанецот, кој треба да остане уште една година во Фиренца за 2,5 милиони евра.
Како што пренесуваат италијанските медиуми, Фиорентина исто така е во преговори за потпишување на нова соработка со 34-годишниот голман, која би го задржала на стадионот „Артемио Франки“ до 2028 година.
Де Хеа е еден од клучните играчи во одличната сезона на Виола. Тимот моментално е осми на табелата со 52 бода, а од Европа ги дели еден пораз на конкурентите. На 28 одиграни натпревари оваа сезона, Шпанецот прими само 29 гола и ја задржа мрежата сува на 10 натпревари – петти најдобар учинок оваа сезона меѓу голманите во италијанскиот шампионат.
Манчестер Јунајтед очигледно не бил свесен дека понекогаш искуството може многу да значи, а кој го има повеќе од играчот со најмногу одиграна минутажа во историјата на Премиер лигата. Де Хеа си замина од англискиот шампионат како трет на листата на голмани со најмногу одбрани (1.157), што само го надополнува „образот“ на „црвените ѓаволи“ кои не се збогуваа на најдобар начин од клупската легенда. Шпанецот не е првиот што процвета по заминувањето од „Олд Трафорд“, а како што стојат работите нема да биде ниту последен.