Дефанзивецот на Наполи и на репрезентацијата на Португалија, Марио Руи не ја исклучи можноста за иден трансфер на неговиот сонародник Кристијано Роналдо во тимот од Неапол.
Фудбалерот на Манчестер Јунајтед е поврзуван со можен трансфер во италијански клуб, а Sky Sport Italia објави дека менаџерот на Роналдо, Жорже Мендеш работи на договор кој исто така би вклучувал трансфер на Виктор Осимен во спротивна насока – од Наполи кај Англичаните.
Според друг локален телевизиски канал, „Раи“, италијанскиот клуб го цени 23-годишниот нигериски репрезентативец на 120 милиони евра и би се согласил да го земе Кристијано Роналдо на позајмица само доколку Манчестер Јунајтед продолжи да му ја плаќа целосната плата.
„Добро го познавам и знам дека секогаш го дава најдоброто од себе. Играч како него може да се справи добро секаде и станува непобедлив кога ќе ја почувствува поддршката од навивачите. Кристијано е легенда во Португалија и во секоја соблекувална, па би го дочекале со раширени раце“, прокоментира Марио Руи.