Спортскиот директор на Барселона, Деко призна дека бил изненаден од одлуката на тренерот на тимот Чави Ернандез да ја напушти функцијата по крајот на сезоната.
Тој беше дециден дека во моментов во клубот не се разговара за тоа кој ќе биде следниот тренер, но посочи каков треба да биде наследникот на легендарниот играч за врска на чело на Каталонците.
„Не го очекував. Секогаш има шпекулации, но никогаш не размислувавме за тоа. Секојдневно сум со него и планиравме трансфери како доаѓањето на Витор Роке и потрагата по можна замена за Алехандро Балде. Разговаравме за следната сезона, затоа и повторно потпишавме со него. Претседателот секогаш сакаше да биде со него до крајот на неговиот мандат. Чави е тој што уште од стартот сакаше пократок договор. Ни рече: „Ако не победувам, мислам дека нема да продолжам“. Тој веќе даде доволно објаснувања. Моето чувство е дека минатогодишната титула беше потценета. Навивачите ја прославија, но печатот и генерално сите останати не и придаваа никакво значење. Ги разбирам барањата, но и фрустрацијата на Чави, кој се чувствува недоволно ценет. Тој дојде во тешко време каде што требаше да покаже голема храброст и застана во одбрана на клубот. Оттогаш секој сам знае колку работите влијаат врз него и дали е подготвен да издржи или не“, изјави Деко и продолжи:
„Сè уште не сме разговарале со ниту еден тренер. Го прифаќаме заминувањето на нашиот ментор. Неговиот наследник треба да ја продолжи линијата на работа. Ќе биде тешко да се биде тим кој не сака да игра добро и да ја има топката во свој посед. Поаѓајќи од оваа идеја, секој тренер има свои карактеристики, но тој што доаѓа мора да има амбиција и глад за големи работи, како и да знае каде пристигнува. Јирген Клоп е одличен тренер, но сега не е време да се зборува за тоа. Новиот тренер ќе сака да направи промени, но прво треба да му го објасниме проектот и идеите. Постојат многу опции. Не го следам многу Тиаго Мота бидејќи тој не е во ниту еден од италијанските тимови што имам навика да ги гледам. Сепак, добро го познавам Рафаел Маркез бидејќи тој е тука. Ова е млад тренер кој се развиваше среде тешкотии. Да се биде тука ќе го направи подобар ментор“.
„Кога Пеп Гвардиола дојде во Барса се зборуваше за голема револуција, што е голема лага. Заминавме јас и Роналдињо, но тука беа Чави и Иниеста, Бускетс во подем, најдобриот африкански играч Јаја Туре, Меси, секако Самуел Ето… Гвардиола беше интелигентен и кога дојде наметна ред и квалитет како тренер, за да го изгради најдобриот тим што некогаш сум го видел во мојот живот. Беше паметен, знаеше да не го троши времето на други работи. Првенството не е завршено. Саботната победа ни дава малку надеж. Следните натпревари пред тој со Наполи ќе бидат важни за нас и нашите ривали. Среќен сум кога со таа зрелост играме како во саботата. Чави и претседателот го знаат тоа. Отсекогаш им велев дека ако имаме среќа да го имаме целиот состав, ќе стигнеме далеку. Ако играме со се што е на располагање, ние сме силен тим“, прокоментира Деко во интервју за „Ла Вангардија“.