Првиот човек на ЦУК, Стојанче Ангелов апелираше до земјоделците да не оставаат плински уреди на полињата. Според него, ваквите уреди се опасност за појава на пожари на отворено и веќе има најмалку еден потврден случај за експлозија на плинска боца. Се појавил пожар кој за среќа брзо бил совладан и не прераснал во шумски пожар.
Вториот апел, како што кажа Ангелов, е до сите луѓе кои живеат во своите стари куќи или викендици во напуштените или полунапуштените села. Доколку забележат лабави жици и кои можат да предизвикаат искрење, истото итно да го пријават во ЕВН.
Директорот на ЦУК исто така информира и дека од земјава си заминале посадата и едниот чешки хеликоптер, еден словенечки хеликоптер, како и двата шведски „ер-трактори“.
Во моментов, на помош од странство имаме еден српски хеликоптер со тритонско ведро, два хеликоптери од Унгарија и два „ер-трактори“ од Германија. Исто така на располагање и помош ни е и тим од 44 пожарникари од Унгарија, со специјални теренски возила, кои дејствуваат во реон на село Брезница.