Единствен заклучок до кој што дојдовме е дека оние што работат многу во оваа држава се најмалку ценети. Нешто што само ни се потврди. Трагично е што власта дозволи сите добри професионалци да си одат од институциите. Од средбата со вицепремиерот за економски прашања добивме идентичен текст од она што досега го добивме и од МОН и од Министерството за финансии. Понудено ни е К-15 кој што нас ни следува со закон и за кој веќе имаме постапка, рекоа денеска на брифинг со медиумите од Државниот испитен центар (ДИЦ) во однос на нивните барања.
Второто нешто што ни е понудено, посочија од таму, ни е линеарно покачување од 2000 денари за половина од вработените, што требаше да се случи и да не биде дел од преговорите.
-Ние ќе престанеме со овие изјави. Ние сакавме со помош на медиумите да покажеме колку се битни луѓето кои што работат во ДИЦ и колку е важна матурата. Не сме добиле ништо – само пазарна понуда, потенцираа од ДИЦ и најавија дека во моментов штрајкот продолжува.
-Тоа што е во надлежност на овие лица што се во штрајк ќе биде во мирување, затоа што ние сме во штрајк, кажаа од Центарот во однос на тоа што понатаму со државната матура.