Новото засилување на Баерн Минхен, Луис Дијаз, денес пристигна во Минхен, каде што ќе помине медицински прегледи и ќе го потпише договорот со Баварците. Колумбиецот доби дозвола да лета за Германија откако Ливерпул прифати понуда од 65,6 милиони фунти од Баерн Минхен, вклучувајќи бонуси.
Дијаз ќе потпише четиригодишен договор со Баерн Минхен со можност за продолжување на договорот за уште 12 месеци, а според германските медиуми ќе добива бруто плата од 14 милиони евра по сезона.
Ливерпул ќе ги искористи парите од неговиот трансфер за потенцијално привлекување на стрелецот на Њукасл, Александар Исак. „Црвените“ веќе го купија Уго Екитике, кој може да игра на позицијата на Дијаз. Истото важи и за Коди Гакпо.
Дијаз му се придружи на Ливерпул во јануари 2022 година за трансфер вреден 37,5 милиони фунти. Тој имаше договор уште две години со тимот од Мерсисајд.