Грчкиот тенисер и хрватскиот тренер раскинаа. Стефанос Циципас објави на својот Инстаграм профил дека раскинал со Горан Иванишевиќ по само два месеци.
Сè започна кога Горан Иванишевиќ остро зборуваше за грчкиот тенисер по неговото испаѓање од Вимблдон во првото коло. Иванишевиќ тогаш рече:
„Тој сака, но не прави ништо. Само „сакам, сакам“, но не гледам никаков напредок. Бев шокиран, никогаш во животот не сум видел играч понеподготвен. Со ова колено, јас сум три пати поподготвен од него. Не знам што правел цела година, но ова е навистина лошо“.
Пристигна и одговорот на Стефанос Циципас, кој индиректно го нарече Горан Иванишевиќ диктатор во интервју за грчките медиуми.
„Кога работам со вистинските луѓе што ги бирам и кои ме прават да се чувствувам опуштено, тоа е вистинското расположение. Тоа не значи дека ќе престанам да тренирам кога сакам или дека ќе бирам колку ќе тренирам. Има луѓе кои знаат колку напорно работиме и што сакаме да постигнеме, но тие успеваат да одржат пријателска атмосфера. Многу е тешко да имаш диктатор и луѓе кои зборуваат негативно за тебе, а не ги чувствуваш блиску до тебе, како семејство“, рече Циципас.
Стигна и одговор од легендарниот хрватски тенисер, кој беше директен.
„Се чувме, за да ја завршиме таа сага. Имавме убав разговор, тоа е нешто што се случува во последните десет дена, нема зла крв. Си се заблагодаривме еден на друг, тој одлучи повторно да се обиде со својот татко. Искрено, најискрено го мислам ова, единствената личност што може да го тренира е неговиот татко. Со него играше најдобар тенис, го познава најдобро, тоа е семеен проект. Тоа е најдобрата одлука, му посакувам се најдобро, тој е премногу добар играч за да биде таму каде што е. Му реков дека ништо нема да се промени ако самиот не среди некои работи во главата“, искрен беше Иванишевиќ.