Довчерашната прва антикорупционерка, Татјана Димитровска се враќа на старото работно место во Државниот завод за ревизија, кое досега и беше во мирување.
Ќе му помага на главниот државен ревизор. Барањето е веќе поднесено.
Собранието ја констатираше нејзината оставка во Државната комисија за спречување на корупцијата, поттикната од поднесеното обвинение за оддавање службена тајна и за незаконско стекнување со безбедносен сертификат, откако се откри дека колега – ревизор полагал во нејзино име.
Истрагата против неа започна во април, по анализата на телефонската комуникација на Небојша Стојановиќ, поранешен директор на ТЕЦ Неготино и обвинет во случајот „Адитив“. Според обвинението, Димитровска, преку апликациите Вибер и Ватсап, му давала на Стојановиќ доверливи податоци за поведени постапки, отворање предмети против правни и физички лица, службени белешки, како и информации за проверка на имотната состојба на обвинетиот и неговото семејство.