Неколку членки на Европската унија ја критикуваа директорката на Меѓународниот монетарен фонд (ММФ), Кристалина Георгиева, во врска со плановите на заемодавачот да започне ревизија на руската економија, прва по агресијата на земјата против Украина.
Франција, Белгија и Полска, како и неколку балтички и нордиски земји, изразија изненадување на состанокот на претставниците на ЕУ оваа недела од одлуката на Фондот на почетокот на овој месец да ги рестартира годишните прегледи на руската економија, рекоа луѓе запознаени со ова прашање.
Литванскиот претставник рече дека неговата земја планира да го покрене ова прашање директно со Георгиева на состанокот на европските министри за финансии во Будимпешта на 14 септември, рекоа изворите, кои сакаа да останат анонимни, објави „Блумберг“.
Дипломатите велат дека тоа го гледаат како потег да му се понуди на рускиот претседател Владимир Путин економска помош и легитимитет додека ЕУ и САД се обидуваат да ја изолираат Москва.
На состанокот на 11 септември, претставникот на Литванија рече дека првата мисија на водечката меѓународна организација во Русија од февруари 2022 година може да ја искористи Москва за пропагандни цели, за да покаже дека меѓународната изолација на Русија се намалува, велат упатените.
Предвидено е и писмо до Георгиева, кое според очекувањата би го потпишале неколку членки на ЕУ, а во кое би била изразена загриженост во врска со процесот што се чини дека води кон нормализација на односите со Москва, велат упатените.
ММФ претходно оваа недела објави дека ги рестартира своите годишни прегледи на руската економија бидејќи економската ситуација во регионот е „посредена“ од порано. Ревизијата на ММФ, позната како евалуација од член 4, е „заемна обврска“ на Фондот и неговите членови, се вели во соопштението.
„Членот 4 не е опција, туку институционална обврска на Фондот и се спроведува во корист на целото членство“, се вели во одговорот на ММФ, пренесува Блумберг.
„Сега веруваме дека сме во ситуација кога можеме да дадеме економска анализа“, рече во интервјуто Алфред Камер, директор на Фондот за Европа.
И ММФ и Русија одбија да разјаснат кој го иницирал рестартирањето на анализите.
Американската министерка за финансии Џенет Јелен неодамна во интервју изјави дека не е против годишните прегледи, но дека ќе биде проблем доколку Москва добие финансиска поддршка од Фондот.
Русија нема аплицирано за помош од ММФ од 2000 година.
ММФ соопшти дека неговите претставници ќе започнат онлајн разговори со руските власти на 16 септември, а потоа ќе отпатуваат за Москва на разговори. Посетата треба да започне на 1 октомври. Еден од нив рече дека ММФ се обидел да ја убеди Русија дека состаноците треба да се одржат во трета земја.
Неодамна, Москва ја назначи Ксенија Јудаева, поранешен заменик-гувернер на руската централна банка, за претставник во извршниот одбор на ММФ. Таа го замени Алексеј Можин, кој на таа позиција беше од деведесеттите.
Во вториот квартал на 2024 година, руската економија забележа годишен раст од 4%, процени Федералната статистичка служба во јули. Растот најверојатно ќе забави до крајот на годината, според економистите анкетирани од Блумберг.