Сите осум пациенти кои беа повредени во пожарот во Кочани и транспортирани во болницата „Пирогов“ во Софија, Бугарија, сега се во подобра здравствена состојба. Според директорот на болницата, д-р Валентин Димитров, сите пациенти се екстубирани и само дел од нив користат маска за кислород. Димитров, кој за бугарската телевизија Нова ги сподели овие информации, истакна дека иако состојбата се подобрува, екипите на болницата и понатаму внимателно ќе ги следат пациентите, бидејќи овие повреди, особено оние кои ги зафаќаат дишните патишта, се многу сериозни и можат да носат ризик по животот.
„Кога станува збор за изгореници кои го зафаќаат горниот и долниот дишен систем, особено кога пациентите вдишале отровни гасови и токсини, ризикот од инфекции е висок“, изјави д-р Димитров, потенцирајќи дека во овие случаи потребен е долг и комплексен третман.
Директорот на „Пирогов“ се осврна и на големиот одговор на бугарските граѓани кои веднаш се вклучија во крводарителската акција за повредените. Според него, ваквиот брз и спонтан одговор од страна на луѓето не се гледа често и тоа покажува голема желба за помош. Тој додаде дека ако биде потребно, акцијата за крводарување ќе продолжи.
„Третманот е скап, бидејќи вклучува бројни биопроизводи, антибиотици и специјализирана опрема, но во овие моменти не размислуваме за трошоците“, рече д-р Димитров, нагласувајќи дека болницата е целосно обезбедена со сите неопходни ресурси.
Димитров информираше дека семејствата на пациентите редовно добиваат информации за нивната состојба, а исто така, македонските власти добиваат известувања за текот на лекувањето. Во посета на болницата беше и тим од македонските медиуми, кој го сретна д-р Димитров и медицинскиот персонал, а разговараше и со бугарскиот пратеник Манол Пејков, кој успеал да организира акција и да собере околу 40.000 евра за помош на семејствата на повредените.
Ова е само еден од многуте примери на солидарност кои излегуваат на површина во овие тешки времиња, додека пациентите продолжуваат со своето лекување, а медицинскиот персонал продолжува со интензивните терапии за што побрзо закрепнување.