Може ли Џошуа Зиркзе да се врати во Италија и да заигра за Јувентус? Напаѓачот на Манчестер Јунајтед беше поврзуван со „бјанконерите“, а очигледно има потешкотии на „Олд Трафорд“. Сепак, спортскиот директор на тимот од Торино, Кристијано Џунтоли, беше внимателен во своите коментари на оваа тема.
„Во однос на влезните трансфери, прво треба да ја поправиме одбраната, па потоа да внимаваме на сите други опции. Зиркзе? Нема да спомнувам имиња, но ќе бидеме внимателни на пазарот“, изјави шефот на Јуве за Радио Серија А.
Зиркзе до минатото лето беше во Серија А со тимот на Болоња, по што се пресели во Јунајтед за 42,5 милиони. евра.
„Старата дама“ веќе е во Ријад, каде избраниците на Тиаго Мота се подготвуваат за учество на турнирот од Суперкупот на Италија. Утре екипата игра полуфинале со Милан, а денеска во другото полуфинале ривали се Интер и Аталанта.
Победниците ќе го играат финалето во понеделник.