Директорот на Мекларен, Андреа Стела ја критикуваше одлуката на стјуардите во Формула 1 да го казнат возачот на тимот Ландо Норис, што тој ja опиша како „несоодветна“, пренесе Ројтерс. Сепак, тоа сериозно ги намали шансите на Норис да се бори за светската титула кај возачите со Макс Верстапен.
Ландо Норис имаше возбудлива битка со Верстапен на патеката во Остин, успевајќи да го помине на крајот од трката, но и двата болиди се најдоа надвор од патеката. Британецот не му го отстапи водството на возачот на Ред Бул по претекнувањето, за што беше казнет со 5 секунди и заврши зад него на четвртото место во поредокот.
„Мојот став е дека начинот на кој стјуардите се вмешаа во нашиот мотоспорт беше несоодветен бидејќи и двата болида беа надвор од патеката, па и двајцата бараа предност“, изјави Стела за Sky Sports. Италијанецот додаде дека одлуката не може да се обжали и Мекларен може само да заборави на случајот.
„Двапати проверивме дали двата болида се надвор од патеката. Нема сомнеж дека нашиот маневар беше правилен“, рече Стела на прашањето зошто на Норис не му беше наложено да се откаже од водството.
Директорот на Ред Бул, Кристијан Хорнер, не се согласи и рече дека стјуардите ја направиле вистинската работа и дека распоредот на подиумот ги одразува реалните резултати.
„Ни беше кристално јасно дека претекнувањето е надвор од патеката, па тој мораше да попушти“, им рече тој на новинарите. „Тој не избра да го направи тоа така и затоа дојде казната. За нас ова е црно-бело“, додаде Хорнер.