Гранит Џака (31) за прв пат проговори за шансите на неговиот тим да го оствари недостижниот сон за освојување на германското првенство. Дури по евроголот и победата од 2:1 против Мајнц, играчот од средниот ред на Баер Леверкузен се согласи да зборува на темата.
Џака ја потенцира важноста на трпението во тимот кој 33 натпревари по ред не почувствувал пораз во лигата.
„Мораме да бидеме трпеливи. Мораме да веруваме во нашите шанси како вечерва, иако имавме среќа со вториот гол“, изјави Џака за германски „Кикер“.
По победата против Мајнц, Баер Леверкузен се искачи на 11 бода над второпласираниот Баерн. На единаесет натпревари до крајот на сезоната, тимот од Леверкузен почнува да ја гледа светлината на крајот од тунелот.
Притисокот е голем, Баерн 11 години по ред ја држи титулата германски шампион. Баер Леверкузен има добри шанси прв да го собори германскиот гигант.
„Го гледам тоа на начин дека имаме што да изгубиме. Ако сега погледнеме што ќе се случи по 34 кола и мислиме дека нема што да загубиме со 8 или 11 бода предност, се лажеме“.
Баер Леверкузен има пауза до 3 март кога патува во Келн со надеж дека ќе ја продолжи серијата без пораз, додека Баерн Минхен се соочува со уште еден тежок предизвик оваа сабота.
Потресениот шампион со три порази во низа, што доведе до пријателска разделба со тренерот Томас Тухел на крајот од сезоната, денеска од 18:30 часот пречекува уште еден тим од врвот на табелата – Лајпциг.