Новото откритие на популарниот телескоп на НАСА ја скокотка фантазијата на љубопитните и научниците, од кои некои отидоа дотаму што овој космички прашалник го нарекоа порака од вонземјани. Одговорот на оваа мистерија е, секако, многу порационален.
Вселенскиот телескоп Џејмс Веб сними крајно бизарен интерпункциски знак исцртан во сликата на Хербиг-Харо 46/47, активно формирана двојна ѕвезда која се наоѓа на 1.470 светлосни години од Земјата. Оваа блиска инфрацрвена слика со висока резолуција направена од вселенскиот телескоп Веб е заеднички напор помеѓу НАСА, Европската вселенска агенција и Канадската вселенска агенција. Но, ако зумирате доволно блиску, ќе видите астрономска карактеристика која, од наша перспектива, неверојатно изгледа како прашалник. Space известува дека оригиналната слика била објавена минатата недела и покажува Хербиг-Харо 46/47, како и очигледен знак прашалник во длабоката вселена.
Неочекуваниот прашалник сугерира на космолошка порака од вонземјани, Бог или постчовечка цивилизација која управува со нашиот симулиран универзум, но нејзината основна причина е далеку од сите овие фантастични претпоставки.
Како одговор на барањето на Space.com, претставниците на Научниот институт за вселенски телескоп (STScI), кој управува со научните операции на Веб, шпекулираа дека овој космички прашалник би можел да биде далечна галаксија или пар галаксии во интеракција. Во тие сценарија, гравитационите сили би можеле да манипулираат со овие галактички структури, што ќе доведе до искривена форма слична на прашалник. Ова исто така може да биде прв пат астрономите всушност да го видат овој далечен објект (или објекти) што постои далеку подалеку од границите на нашиот Млечен Пат.
Мет Каплан, асистент професор по физика на Државниот универзитет во Илиноис, го потврди ова сомневање, велејќи за Space.com дека уникатната карактеристика претставува две галаксии во процес на спојување. Според неговото толкување, необичната форма на објектот горе е потенцијален знак за „плимно пореметување на поголема галаксија“, односно поголема галаксија која е одвоена или искривена од присутните гравитациони сили.