Здравјето на тинејџерите ширум светот е на пресвртна точка, предупредуваат експертите. И покрај напредокот во грижата за малите деца, тинејџерите остануваат запоставени – со зголемување на прекумерната тежина, дебелината и менталните проблеми кои стануваат сè посериозни. Според голем извештај на „Комисијата Лансет за здравје и благосостојба на адолесцентите“, бројот на тинејџери со прекумерна тежина или дебелина до 2030 година ќе достигне 464 милиони – што е 143 милиони повеќе отколку во 2015 година. Во многу земји од Африка и Азија, ова зголемување е дури осумкратно во последниве три децении.
Додека употребата на алкохол и цигари е во опаѓање во сите региони, зголемувањето на телесната тежина и менталните нарушувања се новите главни закани за здравјето на младите. Професорката Сара Берд од Универзитетот Џорџ Вашингтон, една од копретседателките на комисијата, изјави:
„Здравјето и благосостојбата на адолесцентите се во криза. Направен е некој напредок, но менталното здравје значително се влоши, особено по пандемијата на Ковид-19.“
Извештајот исто така посочува дека денешните тинејџери се првите кои ќе ги почувствуваат последиците од климатските промени низ целиот свој живот. Истовремено, тие растат во „подигитален свет“ кој, според експертите, носи и ризици, но и можности. Иако дигиталните уреди и интернетот можат да го влошат менталното здравје, тие нудат и нови шанси за учење, социјализација и работа – доколку се користат со мерка.
Комисијата предупредува дека инвестициите во здравјето на младите се недоволни и не соодветствуваат на сериозноста на предизвиците. Потребни се конкретни и брзи мерки, бидејќи, како што велат авторите на извештајот: „Адолесценцијата повеќе не може да се игнорира. Ако сакаме здрава и просперитетна иднина, мора да вложиме во здравјето и благосостојбата на тинејџерите денес“.
Со стареење на светската популација и намалување на наталитетот дури и во најсиромашните земји, здравјето на младите станува клучен фактор за идниот развој на секое општество.