Европската унија (ЕУ) размислува како да одговори на тарифите што ги воведе претседателот Доналд Трамп, а тој одговор би можел да вклучи мерки што го надминуваат воведувањето царини за американски производи, предупреди францускиот министер за финансии.
„Одговорот ќе биде многу силен“, изјави Ерик Ломбард за француската телевизија BFM/RMC. Тој додаде дека ЕУ разгледува опции како зголемено оданочување и построга регулација на дигиталните услуги, но нагласи дека европскиот одговор ќе биде „пропорционален“, пренесува Newsweek.
На 2 април Трамп воведе царина од 20 отсто за увозот од Европската унија, обвинувајќи ја Унијата за нефер царински мерки против Соединетите Американски Држави, кои според него достигнуваат и до 39 отсто.
„Иако првичното влијание во Европа веројатно ќе биде помало, неизбежно е да продаваме помалку производи – што, за жал, претставува предизвик за нашите компании, особено за извозниците, кои ги има многу и кои дефинитивно ќе се обидеме да ги поддржиме“, рече Ломбард.
„Стратегијата на Трамп е препознатлива – тој пристапува кон преговорите со агресивен предлог. Ние соодветно ќе одговориме на тоа“, истакна тој.
Ломбард, исто така, посочи дека во понеделник се одржуваат серија состаноци во рамките на ЕУ со цел да се договори одговор кој мора да биде избалансиран, но доволно силен за повторно да ја отвори вратата за преговори.
„Сакаме да ги намалиме тензиите што е можно поскоро“, рече тој. „Ова ќе биде врвен приоритет на Европа додека се во сила тарифите, но важно е преговорите да се водат на еднаква основа“.
Францускиот претседател Емануел Макрон реагираше на најавените царини повикувајќи ги европските компании да ги прекинат планираните инвестиции во САД додека не се разјасни ситуацијата. Макрон ги нарече американските царини „брутални и неосновани“, нагласувајќи ја потребата од координиран европски одговор на оваа ситуација.